تخريم فتحات الغاز الطبيعي بالكور: مواسير الغاز والمداخن والهوايات ببنط 2 و3 و5 بوصة
لو بتشتغل في توصيل الغاز الطبيعي، انت عارف إن الفتحة هي اللي بتوقف الشغل: فتحة في حيطة مسلحة جوه الشقة، فتحة في بسطة السلم للصاعد، وفتحة للمدخنة أو الهواية. الشاكوش بيكسّر حوالين الفتحة، وبيعمل دوشة في عمارة سكان، وبيسيب شكل وحش قدام العميل وقدام مفتش الشركة. ماكينة الكور بتعمل الفتحة دايرية ونضيفة وبالمقاس المظبوط في دقايق، من غير تكسير.
مقاسات البنط في شغل الغاز الطبيعي
شغل الغاز بيتعمل بتلات مقاسات بنط بس:
| البنطة | بتستخدمها فين | الماكينة |
|---|---|---|
| 2 بوصة (51 ملي) | فتحات مواسير الغاز جوه الشقة | يدوي أو ستاند |
| 3 بوصة (76 ملي) | الصواعد اللي بتعدّي من بسطة لبسطة | يدوي أو ستاند |
| 5 بوصة (127 ملي) | فتحة المدخنة أو الهواية | ستاند |
مش محتاج أكتر من كده. ولو رسم شركة الغاز طالب مقاس معين في مكان معين، التزم باللي في الرسم.
طول البنطة القياسي 40 سم، يعني الحيطة أو بسطة السلم بتتخرم من مرة واحدة من غير وصلات.
تختار ماكينة إيه؟
القاعدة اللي بنمشي بيها مع كل الفنيين: مقاس الماكينة = مقاس البنطة زائد 2 بوصة. يعني:
- بنطة 2 أو 3 بوصة: ماكينة كور يدوي أوبو 160 أو ماكينة كور أوبو 8 بوصة على الستاند. اليدوي وزنها 7.4 كجم وبتشتغل من غير ستاند، فبتتنقل من شقة لشقة ومن دور لدور بسهولة. والستاند أثبت وأسرع ومش بتتعب الفني، وبتعمل معاها كل المقاسات الأكبر.
- بنطة 5 بوصة: ماكينة ستاند بس. محتاجة ماكينة 7 بوصة، وأقرب مقاس متوفر هو ماكينة كور أوبو 8 بوصة.
قاعدة مهمة: أي شغلانة الماكينة اليدوي بتعملها، ماكينة الستاند بتعملها أقوى وأثبت. لكن مش كل شغلانة الستاند بتعملها، اليدوي تقدر عليها. يعني لو هتشتري ماكينة واحدة لكل شغل الغاز، الستاند 8 بوصة بتغطي الشغل كله.
الماكينة اليدوي للشغل الخفيف: فتحات متفرقة في اليوم ومقاسات صغيرة. الشغل باليدوي بيحمّل على إيد الفني، وبياخد وقت أطول في التخريم، ولازم اللي يشتغل بيها يكون متدرب عليها كويس الأول. وللأمانة: الماكينة اليدوي أوبو 160 قوية وعنيفة، ولو البنطة اتحشرت مش بتقف فورًا وممكن ترد بعنف في إيد الفني، وده ممكن يتسبب في حوادث أو إصابات.
الماكينة بتيجي لوحدها من غير بنط، وبتشتري البنطة بالمقاس اللي شغلك محتاجه.
فتحة المدخنة والهواية: من ضمن شغل الغاز
مدخنة (شكمان) سخان الغاز وفتحة الهواية في المطبخ أو الحمام بيعملهم فني الغاز نفسه، وبنفس القاعدة: بنطة 5 بوصة (127 ملي)، ومكان الفتحة وارتفاعها حسب مواصفة شركة الغاز. الفرق الوحيد في الماكينة حسب الحيطة:
- حيطة طوب أحمر: الماكينة اليدوي أوبو 160 بتخرّم الطوب لحد 6 بوصة من غير تثبيت، أو الستاند 8 بوصة لو شغلك كتير كل يوم، متثبتة بخرم نافذ وتيش 12 ملي من الناحيتين.
- حيطة خرسانة مسلحة: ستاند 8 بوصة بس، لأن بنطة 5 بوصة محتاجة ماكينة أكبر منها ببوصتين.
خطوات فتحة الغاز بالكور
- علّم مكان الفتحة زي ما الرسم أو مهندس شركة الغاز محدد.
- بص على الناحية التانية من الحيطة الأول: مفيش مواسير مية ولا كابلات كهرباء في مسار البنطة. ولو الفتحة في بسطة السلم، بص على الدور اللي تحت.
- ثبّت الماكينة كويس. لو ستاند: دق أكمن في الخرسانة واربط القاعدة، وبعدها ظبّط مسامير الاتزان اللي تحت القاعدة لحد ما الماكينة ما تهتزش. في الطوب ثبّت الستاند بخرم نافذ وتيش 12 ملي (جويد أو مسمار من غير راس) من الناحيتين، أو بمسمار تثبيت الحوائط المخصوص لو مش هتوصل لورا الحيطة. لو يدوي: امسكها بالإيدين وخلّي البنطة عمودية على الحيطة.
- وصّل المية. البنطة لازم تشتغل بمية طول الوقت. حط إسفنجة أو فوطة تحت الفتحة عشان المية ما تنزلش على أرضية العميل.
- ابدأ بضغط خفيف لحد ما البنطة تثبت في الخرسانة، وبعدين زوّد بالراحة. الضغط الجامد مش بيسرّع الفتحة، بيبوظ الفص والماكينة.
- طلّع الكور ونضّف الفتحة، وعدّي الماسورة واقفل حواليها.
تحذير: متخرّمش في كمرة أو عمود من غير موافقة مهندس إنشائي. الحيطة والبسطة عادةً مفيهاش مشكلة، لكن الكمرة اللي شايلة حاجة تانية.
أشهر غلطات الفنيين في شغل الكور (وبعضها فيه خطر على حياتك)
- يشغّل ماكينة الستاند على إنها يدوي. يفكها من الستاند ويمسكها بإيده ويخرّم. دي أخطر غلطة في المجال كله، وبتعمل حوادث كبيرة ممكن توصل للوفاة. ماكينة الستاند مش معمولة تتمسك بالإيد.
- مبيثبتش الماكينة ويقف عليها برجله فاكر إن وزنه هيثبّتها. الماكينة بتتحرك وهي شغالة، وده خطر كبير.
- يدق الأكمن في الطوب الأحمر. الأكمن معمول للخرسانة بس. في الطوب ممكن يطلع من مكانه والماكينة شغالة ويحصل حادث. في الحيطة الطوب، أأمن طريقة لتثبيت الستاند: خرم نافذ يطلع من الناحية التانية من الحيطة، تعدّي فيه تيش 12 ملي (جويد أو مسمار من غير راس) وتربط بيه الماكينة على الحيطة من الناحيتين. ولو مش هتقدر توصل لورا الحيطة، في مسمار مخصوص لتثبيت ماكينة الكور في الحوائط، متوفر عندنا. أو خرّم بالماكينة اليدوي من غير تثبيت (بتخرّم الطوب الأحمر لحد 6 بوصة).
- يضغط على دراع التغذية بقوة عشان يخلص بسرعة. ده بيبوظ الماكينة والفص، وممكن يطلّع الماكينة من مكانها أو يحشر البنطة في الخرسانة.
- يثبّت الماكينة ويكسل يظبط مسامير الاتزان اللي تحت القاعدة. الماكينة بتبقى مش متزنة، والحمل عليها بيزيد، والبنطة بتتحشر.
- يشتغل من غير مية. الفص بيتحرق في دقايق.
- يشتغل بسرعة دوران مش مناسبة لقطر البنطة، خصوصًا لو السرعة أعلى من اللازم: خطر، وبيبوظ الفص.
- مبيراجعش ريجلاج عربية الماكينة. العربية هي الجزء اللي الموتور مربوط فيه وبيطلع وينزل على العمود المربع. لو ريجلاجها سايب الماكينة بتهتز وهي بتخرّم، وده بيعمل أعطال كتير. راجعه بشكل دوري.
- يشغّل الماكينة على مولد غير مناسب. مولد ضعيف أو غير منتظم، أو مولد قوي بس متوصل عليه جهاز قوي تاني زي ماكينة لحام في نفس الوقت: كل ده ممكن يحرق الموتور.
ليه الكور وليس الشاكوش في شغل الغاز؟
- فتحة بالمقاس: الماسورة بتدخل من غير حشو ولا معجون، والشكل محترم قدام العميل ومفتش الشركة.
- دوشة أقل بكتير في عمارة سكان، خصوصًا لو بتشتغل في أكتر من شقة في نفس اليوم.
- أسرع: الفتحة بتخلص في دقايق، فالفريق بيلحق شقق أكتر في اليوم.
- مفيش تشققات: الكور بيقطع بالدوران من غير طرق، فالمحارة والبلاط حوالين الفتحة بيفضلوا سليمين.
البنطة بتعيش قد إيه؟
عمر البنطة بيعتمد على المية والضغط: مية كفاية وضغط هادي يعني فتحات أكتر بكتير. ولما الفصوص تخلص، البنطة مش بتترمي: بنركّب فصوص جديدة وترجع تشتغل من جديد بجزء من تمنها، والتركيب شامل 3 اختبارات للبنطة (السماكة والرفة والبيضاوي) وقصها عشان نتأكد إنها سليمة وتنفع تشتغل تاني.
بتجهّز فريق أو شركة؟
لو شركتك بتجهّز فرق توصيل غاز بماكينات وبنط، كلّم خدمة العملاء على واتساب وقول عدد الفرق، وهتاخد سعر الكمية وتوصيل لحد باب الشركة. شحن سريع داخل وخارج مصر لأي محافظة.
شغلك مش غاز؟ شوف مقاس البنطة والماكينة لكل شغلانة كور.
أسئلة بتتكرر
أقدر أعمل فتحة الغاز بالدريل أو الشاكوش؟
الدريل والشاكوش بيعملوا فتحة مكسّرة الحواف، وبيقفوا عند أول سيخ حديد. الكور بيقطع الحديد والخرسانة مع بعض وبيطلع فتحة دايرية نضيفة بالمقاس اللي انت عايزه.
أشتري ماكينة يدوي ولا ستاند؟
لو شغلك فتحات 2 و3 بوصة متفرقة في اليوم وبتتنقل كتير: يدوي أوبو 160، أو ستاند 8 بوصة لو عايز ماكينة تعمل كل المقاسات. لو بتعمل فتحات 5 بوصة، أو فتحات كتير كل يوم: ستاند 8 بوصة. ولو مش متأكد، كلّم خدمة العملاء واحكي شغلك.
بنطة 2 بوصة بتركب على أنهي ماكينة؟
على أي ماكينة كور عندنا، يدوي أو ستاند. كل مقاسات البنط بتركب على كل الماكينات.
الماكينة بتشتغل على كهرباء إيه؟
كهرباء عادية 220 فولت من أي فيشة في الشقة.
فتحة مدخنة السخان بتتعمل بإيه؟
بنفس بنطة 5 بوصة بتاعة شغل الغاز. في الطوب الأحمر بالماكينة اليدوي من غير تثبيت، وفي الخرسانة المسلحة بماكينة ستاند 8 بوصة.
لو الحيطة طوب أحمر؟
الماكينة اليدوي بتخرّم الطوب الأحمر لحد 6 بوصة من غير تثبيت. ولو هتشتغل بالستاند، متدقش أكمن في الطوب أبدًا: في الطوب ثبّت الستاند بخرم نافذ وتيش 12 ملي (جويد أو مسمار من غير راس) من الناحيتين، أو بمسمار تثبيت الحوائط المخصوص لو مش هتوصل لورا الحيطة.
الفتحة بتاخد وقت قد إيه؟
فتحة الغاز في حيطة عادية بتخلص في دقايق قليلة لما المية والضغط مظبوطين. أكتر وقت بيتصرف في التجهيز مش في التخريم نفسه.
بتعملوا فتحات غاز عند العميل؟
لأ. احنا متخصصين في بيع وصيانة ماكينات الكور والبنط بس. الصفحة دي عشان تختار المعدة الصح وتشتغل بيها بنفسك أو بفريقك.
أسعار ماكينة وبنط شغل الغاز الطبيعي
تقدر تبدأ بماكينة كور يدوي بـ6,280 ج.م وبنطة 2 بوصة بـ540 ج.م، يعني إجمالي 6,820 ج.م. أو بماكينة ستاند 8 بوصة بـ14,160 ج.م وهي بتعمل كل مقاسات الغاز لحد 5 بوصة.
| الماكينة أو البنطة | السعر |
|---|---|
| ماكينة كور أوبو يدوي 160 OB-160خفيفة وبتشتغل من غير ستاند: لفتحات 2 و3 بوصة في الشقق وبسطات السلم | 6,280 ج.م |
| ماكينة كور أوبو 8 بوصة OB-205على الستاند: بتعمل كل مقاسات الغاز من 2 لـ 5 بوصة، وأثبت وأسرع لو فريقك بيخرّم كتير كل يوم | 14,160 ج.م |
| بنطة كور 2 بوصة (51 ملي)فتحات مواسير الغاز جوه الشقة | 540 ج.م |
| بنطة كور 3 بوصة (76 ملي)الصواعد من بسطة لبسطة | 740 ج.م |
| بنطة كور 5 بوصة (127 ملي)فتحة المدخنة أو الهواية | 1,215 ج.م |
السعر المكتوب هو السعر اللي هتدفعه. مفيش سعر معمول يجذبك وتتفاجئ بغيره لما تكلمنا. الماكينة بتيجي لوحدها من غير بنط، والبنطة بتتشرى حسب مقاس شغلك. شحن سريع داخل وخارج مصر، ومصاريفه بتتحسب حسب مكانك ووزن الطلب.