قص الخرسانة بالمنشار: الدليل الكامل والأسعار
لو عندك شغل قص خرسانة مسلحة: فتحة باب أو شباك، قص سقف، إزالة جزء من حيطة أو كمرة، أو تقطيع بلاطة لنقلها، الطريقة اللي هتختارها بتفرق في الوقت والنظافة وسلامة المبنى. المنشار الماسي بيقطع الخرسانة المسلحة بحديدها في خط مستقيم، من غير تكسير ولا اهتزاز.
الشغلانات اللي بيتشتري لها المنشار
- أعمال الإنشاءات والتعديلات المعمارية.
- فتح الأبواب والشبابيك في الحوائط الخرسانية.
- فتح مسارات المصاعد والأسانسير.
- تعديل وتغيير تقسيم المباني.
- قص فتحات الدوبلكس في الأسقف.
- قص السلالم.
- فصل الكتل الخرسانية الكبيرة لنقلها.
طرق قص الخرسانة: إيه الفرق؟
| الطريقة | تنفع لإيه | عيوبها |
|---|---|---|
| الصاروخ (جلخ بديسك صغير) | قصّات سطحية قليلة العمق في الطوب أو المحارة، وتعليم خط القص | عمقه سنتيمترات قليلة، تراب كتير، ومش هيقطع حيطة أو سقف خرساني |
| الشاكوش والتكسير | إزالة خرسانة مش مهم شكلها ولا حوافها | اهتزاز وتشققات حوالين المكان، حواف مكسّرة محتاجة ترميم، ودوشة لساعات |
| منشار الخرسانة (ديسك ماسي على سكة) | الحوائط والأسقف والكمرات والأرضيات: أبواب، شبابيك، فتحات سلالم وأسانسير ودوبلكس | محتاج مية وكهرباء وتثبيت السكة، وعمق القص على حسب قطر الديسك |
| الواير (سلك ماسي) | الأجزاء السميكة جدًا أو الأشكال اللي الديسك مش بيوصلها: كمرات ضخمة، أعمدة، كتل خرسانة | أغلى وأبطأ في التجهيز، ومحتاج خبرة |
| الكور (فتحات دايرية متجاورة) | فتحات صغيرة أو زوايا | حواف مسننة، ومش عملي للفتحات الكبيرة |
وبالنسبة لـ«قص الخرسانة بالليزر» اللي بتسمع عنه: مفيش ليزر بيقطع خرسانة. المقصود دايمًا المنشار الماسي، وبيتسمى كده لأن القصة بتطلع مستقيمة ونضيفة كأنها بالليزر.
عمق القص بيتحدد بقطر الديسك
منشار المتر بيقطع من ناحية واحدة لحد 41 سم بديسك قطر 1 متر، ولحد 31 سم بديسك 80 سم. أما ديسكات 60 و40 سم فمينفعش تتركب على منشار المتر: الديسك بيبقى ضعيف على ضغط المنشار الكبير وبيتعوج، ودول للمناشير الأصغر.
| قطر الديسك | عمق القص على منشار المتر |
|---|---|
| 1 متر | لحد 41 سم |
| 80 سم | لحد 31 سم |
| 60 سم و40 سم | مش للمنشار ده، للمناشير الأصغر |
أخطر غلطة في قص الخرسانة
إن الفني يخلّي سرعة جر المنشار عالية. التغذية، سواء الأفقية أو الرأسية، لازم تكون بطيئة، ولو هتزوّد السرعة زوّدها بالتدريج البطيء جدًا حسب استجابة المنشار ونوع الخرسانة وعمقها. السرعة العالية بتحرق الفصوص وبتجهد الموتور وممكن تعوّج الديسك.
إيه اللي بيحدد سعر قص الخرسانة؟
سعر المتر بيختلف من شغلانة لشغلانة، وده طبيعي، لأنه بيتحدد بـ:
- سمك الخرسانة: كل ما السمك زاد، الوقت واستهلاك الديسك بيزيدوا.
- نوع الخرسانة وتسليحها: خرسانة زلط ولا سن، ودرجة إجهادها، وكثافة الحديد فيها. الكمرات والأعمدة فيها حديد أكتر بكتير من الحوائط العادية.
- طول القص وعدد الجوانب: فتحة باب 2 متر في 1 متر يعني 5 متر قص على الأقل.
- مكان الشغل: دور عالي، مكان ضيق، توفر مية وكهرباء، وهل القطع هتتشال بونش.
- استهلاك الديسك: الديسك بيستهلك مع كل متر، وده جزء أساسي من التكلفة.
عشان كده مفيش سعر ثابت للمتر. اللي ثابت: لو شغلك بيتكرر، المنشار بتاعك بيجيب تمنه من الشغلانات اللي كنت بتدفع تمنها لغيرك، وبعدها كل قصة بتبقى بتمن الديسك والوقت بس.
المنشار اللي عندنا
منشار قص الخرسانة المسلحة بديسك قطر 1 متر، وبيتسمى كمان منشار أرضيات لأنه بيقص الأرضيات برضه. بيتركب على سكتين طول كل واحدة 120 سم تتثبت على الحيطة أو السقف أو الأرض، وبيقطع طوليًا مهما كان التسليح. موجود بقدرتين وتلات أنظمة تحكم:
- 6880 وات نص أوتوماتيك: للشغل المتوسط.
- 10800 وات يدوي: القدرة الكاملة بأقل سعر، والتحكم في تقدم الماكينة بإيدك.
- 10800 وات نص أوتوماتيك: جزء من الحركة بموتور، فالمجهود أقل والقصة أظبط.
- 10800 وات أوتوماتيك بالكامل: الحركة كلها بموتور وانت بتراقب، أقل مجهود وأظبط قصة.
الديسكات المناسبة لمنشار المتر: 1 متر و80 سم. وواير قص الخرسانة للأجزاء اللي الديسك مش بيوصلها. ولما فصوص الديسك تخلص، بنركّب فصوص جديدة ويرجع يشتغل.
أسئلة بتتكرر
أقدر أقص خرسانة مسلحة بالصاروخ؟
الصاروخ بيقطع سنتيمترات قليلة وبيعمل تراب كتير. ينفع لتعليم خط القص أو للطوب، لكن مش هيقطع حيطة أو سقف خرساني. ده شغل المنشار.
قص المتر بياخد وقت قد إيه؟
مفيش رقم ثابت، لأن سرعة القطع بتتأثر بعوامل كتير: خبرة الفني، عمق الخرسانة ونوعها (سن ولا زلط) ودرجة إجهادها وتسليحها، مستوى التبريد بالمية، نوع المنشار وسرعة دورانه، نوع الفص وجودته، ووضع القطع أفقي ولا رأسي.
القص بيعمل اهتزاز يأثر على المبنى؟
لأ، المنشار بيقطع بالدوران مش بالطرق، فمفيش اهتزاز ولا تشققات زي التكسير. بس أي قص في عنصر إنشائي (كمرة، عمود، سقف) لازم يتراجع من مهندس إنشائي الأول.
المنشار بيشتغل على كهرباء إيه؟
220 فولت.
الديسك بيعيش قد إيه؟
على حسب سمك الخرسانة وكثافة الحديد والمية وسرعة الجر. مية مستمرة وتغذية بطيئة يعني متر أكتر من كل ديسك. ولما الفصوص تخلص، الديسك بيتجدد بفصوص جديدة ومش بيترمي، والتركيب شامل اختبار الرفة واختبار السماكة للديسك عشان نتأكد إنه سليم وينفع يشتغل تاني.
بتقصوا خرسانة عند العميل؟
احنا متخصصين في بيع وصيانة معدات القص والتخريم بس. الصفحة دي عشان تعرف تختار الطريقة والمعدة الصح، وتعملها بنفسك أو بفريقك.
أسعار مناشير قص الخرسانة
سعر منشار قص الخرسانة المسلحة بيبدأ من 84,690 ج.م حسب القدرة ونظام التحكم.
| المنتج | السعر |
|---|---|
| منشار قص الخرسانة المسلحة بقطر 1 متر – أوبو الأصلي6880 وات – نص أوتوماتيك | 84,690 ج.م |
| منشار قص الخرسانة المسلحة بقطر 1 متر – أوبو الأصلي10800 وات – يدوي | 89,600 ج.م |
| منشار قص الخرسانة المسلحة بقطر 1 متر – أوبو الأصلي10800 وات – نص أوتوماتيك | 94,865 ج.م |
| منشار قص الخرسانة المسلحة بقطر 1 متر – أوبو الأصلي10800 وات – أوتوماتيك بالكامل | 109,340 ج.م |
| ديسكات منشار قص الخرسانة المسلحة16 بوصة (40 سم) | 3,710 ج.م |
| ديسكات منشار قص الخرسانة المسلحة24 بوصة (60 سم) | 4,730 ج.م |
| ديسكات منشار قص الخرسانة المسلحة80 سم – درجة أولى | 9,800 ج.م |
| ديسكات منشار قص الخرسانة المسلحة1 متر – درجة أولى | 13,475 ج.م |
| واير قص الخرسانة المسلحة الأصلي – كرتونة 50 متر + 100 جلبة | 73,250 ج.م |
السعر المكتوب هو السعر اللي هتدفعه. مفيش سعر معمول يجذبك وتتفاجئ بغيره لما تكلمنا. شحن سريع داخل وخارج مصر، ومصاريفه بتتحسب حسب مكانك ووزن الطلب.