اختار شغلك: مقاس البنطة والماكينة المناسبة لكل شغلانة كور

كل شغلانة ليها مقاس بنطة وماكينة مناسبة. اختار شغلك من الصفحات اللي تحت، وهتلاقي في صفحة واحدة: المقاس المظبوط، الماكينة اللي تنفعك، خطوات الشغل، والأسعار الحالية. ولو شغلك مش موجود، الجدول ده هيوصلك للمقاس في دقيقة.

جدول سريع: الشغلانة والمقاس والماكينة

الشغلانة	مقاس البنطة	الماكينة
فتحات التكييف	من 2.5 لـ 4 بوصة حسب التكييف	يدوي للفتحات المتفرقة، ستاند للشغل اليومي
التكييف المركزي	حسب مقاس الدكت أو الماسورة، والفتحات الكبيرة بالمنشار	ستاند أو منشار
شغل الفايبر (بسطات السلم)	2 بوصة (51 ملي)	يدوي أو ستاند
كاميرات المراقبة والشبكات	حسب عدد الكابلات والمواسير اللي هتعدّي	يدوي أو ستاند
كابلات الكهرباء	حسب عدد المواسير والكابلات اللي هتعدّي مع بعض	يدوي أو ستاند
الطاقة الشمسية	حسب كابلات الألواح والمواسير اللي هتنزل من السطح	يدوي أو ستاند
الغاز الطبيعي	2 بوصة (51 ملي) جوه الشقة · 3 بوصة (76 ملي) للصواعد من البسطة · 5 بوصة (127 ملي) للمدخنة أو الهواية	يدوي أو ستاند للـ 2 و3 بوصة، وستاند للـ 5 بوصة
شفاط المطبخ والتهوية	حسب مقاس الشفاط: قيس ماسورة الشفاط وزوّد عليها من 1 لـ 2 سم	يدوي أو ستاند
مواسير الصرف والمية	مقاس الماسورة زائد بوصة واحدة. الشائع من 3 لـ 7 بوصة	يدوي للصغير، ستاند للكبير
مواسير الحريق (الفاير)	من 4 لـ 7 بوصة	ستاند
خزانات المياه وحمامات السباحة	حسب مقاس الماسورة، وفي السباكة زوّد بوصة	ستاند للخرسانة السميكة
الكور تست (عينات الخرسانة)	4 بوصة و6 بوصة	ستاند
تزريع الأشاير والمسامير والأسياخ	من 14 لـ 46 ملي ببنط التزريع	يدوي أو ستاند، والأصغر أسرع
المصانع والمحطات	حسب مسامير تثبيت الماكينات أو الخطوط اللي هتعدّي	يدوي أو ستاند
فتحات السقف والكمر	كل المقاسات	يدوي للمقاسات الصغيرة لحد 20 سم عمق، وستاند لكل المقاسات
الرخام والجرانيت	بنط خاصة بالرخام	يدوي أو ستاند

خد بالك في السباكة: مقاس الماسورة غير مقاس البنطة

السباك بييجي يقول «عايز بنطة 6 بوصة» عشان يعدّي ماسورة 6 بوصة. ماسورة الـ6 بوصة في السباكة قطرها الخارجي 160 ملي، لكن بنطة الـ6 بوصة في الكور بتعمل فتحة 152 ملي، يعني الماسورة مش هتدخل. القاعدة: في السباكة خد بنطة أكبر من الماسورة ببوصة واحدة. ماسورة 6 بوصة تاخد بنطة 7 بوصة، وماسورة 4 بوصة تاخد بنطة 5 بوصة، وهكذا.

وفي باقي الشغل: قيس القطر الخارجي لكل اللي هيعدّي في الفتحة مع بعض (المواسير بالعزل، الكابلات، الخراطيم) وزوّد من 1 لـ 2 سم عشان يعدّوا بسهولة. ولو الكتالوج أو شركة الغاز أو التكييف كاتبة مقاس معين، امشي عليه.

وافتكر: البوصة في الكور = 25.4 ملي، وتختلف عن بوصة السباكة.

الكور تست والتزريع: شغل بمقاسات ثابتة

• الكور تست: أخذ عينات أسطوانية من الخرسانة عشان تتختبر في المعامل وكليات الهندسة. بيتعمل ببنطة 4 بوصة أو 6 بوصة بس، على ماكينة ستاند عشان العينة تطلع مستقيمة وسليمة.
• التزريع: تخريم الخرسانة لزرع الأشاير أو المسامير أو الأسياخ بالإيبوكسي. بيتعمل ببنط التزريع الصغيرة من 14 لـ 46 ملي، وفصوصها مخصوصة للمقاسات دي.

مقاس الماكينة

مقاس الماكينة هو أكبر بنطة تركب عليها، لكن الشغل المريح أقل من كده بدرجتين: ماكينة 8 بوصة مريحة لحد 6 بوصة، و7 و8 بوصة للشغل القليل. لو الشغل الكبير كتير، خد ماكينة 10 بوصة. ونفس الكلام لباقي المقاسات.

• يدوي: خفيف وبتشيله بإيدك، للمقاسات لحد 5 بوصة وعمق لحد 20 سم، وللفتحات المتفرقة. وللأمانة: اليدوي Oubao 160 قوية وعنيفة، ولو البنطة اتحشرت مش بتقف فورًا وممكن تتسبب في حوادث أو إصابات، فمحتاجة فني متدرب.
• ستاند: بيتثبت في الحيطة أو السقف، لكل المقاسات، وللشغل اليومي في خرسانة مسلحة تقيلة. أسرع وأظبط والفتحة بتطلع مستقيمة. وأي شغلانة اليدوي بتعملها، الستاند بتعملها أقوى وأثبت؛ لكن مش كل شغلانة الستاند بتعملها اليدوي تقدر عليها.
• مش عارف؟ احسبها بنفسك في أقل من دقيقة بقطر الفتحة وعمقها وعدد الفتحات في اليوم، أو اعرف إيه اللي بيحدد سعر الماكينة.

طول البنطة والعمق

طول البنطة القياسي في كل المقاسات 40 سم، و45 سم بالزور (الجزء اللي بيتركب في الماكينة). لو عمق التخريم أكبر من 40 سم، بتستخدم وصلات تطويل: وصلة ورا وصلة، وعندنا زبون وصل بيها لعمق 18 متر. وفي بنط طول 1 متر لبعض المقاسات، للشغل اللي مش عايز فيه وصلات، أو لما الكور بيبقى صعب يتكسر كل 40 سم بسبب الحديد الماشي بطول الفتحة.

أشهر غلطات شغل الكور (وبعضها فيه خطر على حياتك)

دي الغلطات اللي بنشوفها أكتر في كل التخصصات، وبعضها بيعمل حوادث، والباقي بيعمل أعطال وبيبوظ الفصوص:

1. تشغيل ماكينة الستاند على إنها يدوي. الفني يفكها من الستاند ويمسكها بإيده ويخرّم. دي أخطر غلطة في المجال كله، وحوادثها ممكن توصل للوفاة. ماكينة الستاند مش معمولة تتمسك بالإيد.
2. التثبيت بالرجل. الفني ما يثبتش الماكينة ويقف على القاعدة برجله فاكر إن وزنه كفاية. الماكينة بتتحرك وهي شغالة، وده خطر كبير.
3. الأكمن في الطوب الأحمر. الأكمن معمول للخرسانة بس. في الطوب ممكن يطلع من مكانه والماكينة شغالة ويحصل حادث. في الحيطة الطوب، أأمن طريقة لتثبيت الستاند: خرم نافذ يطلع من الناحية التانية من الحيطة، تعدّي فيه تيش 12 ملي (جويد أو مسمار من غير راس) وتربط بيه الماكينة على الحيطة من الناحيتين. ولو مش هتقدر توصل لورا الحيطة، في مسمار مخصوص لتثبيت ماكينة الكور في الحوائط، متوفر عندنا.
4. الضغط على دراع التغذية بالعافية. مش بيخلّص الفتحة أسرع؛ بيبوظ الماكينة والفص، وممكن يطلّع الماكينة من مكانها أو يحشر البنطة.
5. إهمال مسامير الاتزان اللي تحت القاعدة. التثبيت في نقطة الأكمن بس بيخلّي الماكينة مش متزنة، فالحمل عليها بيزيد والبنطة بتتحشر في الخرسانة.
6. الشغل من غير مية. الفص بيتحرق في دقايق.
7. سرعة دوران مش مناسبة لقطر البنطة، خصوصًا لو أعلى من اللازم: خطر، وبتبوظ الفص.
8. إهمال ريجلاج عربية الماكينة. العربية هي الجزء اللي الموتور مربوط فيه وبيطلع وينزل على العمود المربع. لو ريجلاجها سايب الماكينة بتهتز وهي بتخرّم، وده مصدر أعطال كتير. راجعه بشكل دوري.
9. مولد كهربا غير مناسب. مولد ضعيف أو غير منتظم، أو مولد قوي بس متوصل عليه جهاز قوي تاني زي ماكينة لحام في نفس الوقت. كل ده ممكن يحرق الموتور، وبيحصل في الكور والمنشار.

قواعد بتنفع في كل شغلانة

• المية هي عمر البنطة: مية مستمرة على البنطة طول التخريم، ولو مفيش مصدر مية جنبك استخدم مضخة.
• ابدأ ببطء وزوّد الضغط بالراحة: الضغط بالعافية بيحرق الفصوص وبيبطّأ الشغل.
• لو البنطة وقفت فجأة: في الماكينة الستاند، نظام الأمان (السيفتي كلاتش) بيفصل الحركة لأن الستاند متثبت، فارجع لورا شوية وكمّل. أما الماكينة اليدوي فمش بتقف فورًا، وممكن ترد بعنف في إيدك، علشان كده الضغط الخفيف من الأول أهم حاجة.
• ابعد عن الأعمدة والكمرات: إلا بموافقة مهندس إنشائي، لأن قطع حديد التسليح فيها ممكن يضعف المبنى.
• البنطة مش بتترمي: لما الفصوص تخلص، جدّدها وترجع تشتغل من جديد، والتركيب شامل 3 اختبارات للبنطة (السماكة والرفة والبيضاوي) وقصها عشان نتأكد إنها سليمة وتنفع تشتغل تاني.