قص الأرضيات والبلاطات الخرسانية بالمنشار: مجاري المواسير وإزالة أجزاء من الأرضية

في المصانع والجراجات والمخازن والمشاريع اللي أرضيتها خرسانة مسلحة، بتيجي شغلانات زي: فتح مجرى في الأرضية لمواسير صرف أو مية أو كابلات، إزالة جزء من الأرضية لعمل قاعدة ماكينة أو بير، أو تقطيع بلاطة خرسانية لقطع تتشال. التكسير بالشاكوش بيبوظ اللي حوالين المكان وبياخد أيام. منشار الخرسانة بيقطع الأرضية في خط مستقيم بحديدها، وبيطلّع القطع نضيفة وبالمقاس.

شوف أسعار المنشار والديسكات

المنشار اللي بيقص الأرضيات

المنشار اللي عندنا هو نفسه منشار المتر اللي بيقص الحوائط والأسقف، وبيتسمى كمان منشار أرضيات لأنه بيقص الأرضيات برضه. بيتركب على سكة بتتثبت على الأرضية، وبيقطع لعمق 41 سم بديسك قطر 1 متر. ولو بتدوّر على منشار أسفلت (المنشار اللي بيتمشى بيه على الطرق)، ده مش عندنا.

99% من الفنيين بيشتروا منشار المتر لأن أغلب الخرسانات اللي بتتقص سمكها مش بيعدّي 40 سم، وديسك المتر الواحد بيقطع بيه كل الشغل، سواء السمك 10 سم أو 41 سم.

معلومة للأمانة: ديسك المتر الجديد بيقدر ينزل لعمق 42 سم، لكن أول ما الفص يبدأ يتآكل العمق بيقل. علشان كده بنقول 41 سم، عشان تحسب على الرقم اللي هتلاقيه فعلًا طول عمر الديسك.

ديسكات 40 و60 سم مش بتتركب على منشار المتر: بتتعوج تحت ضغطه. الديسك الأصغر اللي ينفع عليه هو 80 سم، وبيقطع لعمق 31 سم. والمنشار موجود بقدرتين وتلات أنظمة تحكم (يدوي، نص أوتوماتيك، أوتوماتيك بالكامل)؛ الفرق في دليل قص الخرسانة.

خطوات قص مجرى في أرضية خرسانية

1. علّم خطي المجرى على الأرضية بالعرض والطول المطلوبين.
2. اتأكد من اللي تحت الأرضية: مواسير أو كابلات مدفونة. ولو الأرضية فوق دور تاني فهي سقف، وساعتها لازم موافقة مهندس إنشائي، واقرأ قص فتحات الأسقف.
3. ثبّت السكة على الخط الأول تثبيت كامل. أي حركة في السكة بتعوّج الديسك.
4. مية مستمرة طول القص.
5. اقص على مرحلتين. لو الأرضية 40 سم، انزل 20 سم الأول واقطع لحد آخر السكة، وبعدين ارجع من الأول وكمّل الـ 20 سم الباقيين من غير ما تنقل السكة، عشان الديسك يمشي في نفس الخط من غير ميلان.
6. التغذية بطيئة، ولو هتزوّدها زوّدها بالتدريج البطيء حسب استجابة المنشار.
7. انقل السكة للخط التاني وكرّر، وبعدين طلّع الجزء اللي بين الخطين حسب حجمه.

أشهر غلطات قص الأرضيات

• سرعة الجر أعلى من اللازم. أكتر غلطة في القص: بتحرق الفصوص وبتجهد الموتور وممكن تعوّج الديسك، سواء المنشار يدوي أو نص أوتوماتيك أو أوتوماتيك بالكامل.
• النزول بالعمق كله مرة واحدة بدل مرحلتين في نفس السكة.
• نقل السكة بين المرحلتين، فالقصة التانية ما بتجيش على خط الأولى.
• ديسك 40 أو 60 سم على منشار المتر.
• مولد غير مناسب. مواقع المصانع والمشاريع بتشتغل كتير على مولدات: مولد ضعيف أو غير منتظم، أو مولد قوي بس عليه ماكينة لحام في نفس الوقت، بيحرق الموتور.
• قص من غير مية كفاية.

سعر المتر والديسك

مفيش سعر ثابت لمتر القص، لأنه بيتحدد بسمك الأرضية وتسليحها وطول القص ومكان الشغل واستهلاك الديسك. ولما فصوص الديسك تخلص بيتجدد بفصوص جديدة ومش بيترمي، والتركيب شامل اختبار الرفة واختبار السماكة للديسك عشان نتأكد إنه سليم وينفع يشتغل تاني. التفاصيل في دليل قص الخرسانة.

أسئلة بتتكرر

منشار الأرضيات هو نفسه منشار الحوائط؟

أيوه. نفس منشار المتر، بيتثبت على سكة في الأرض أو الحيطة أو السقف.

الأرضية أسمك من 41 سم؟

منشار المتر بيقطع 41 سم. الأسمك من كده بيتعامل حسب الحالة. كلّمنا واشرح الشغل.

ينفع ديسك 40 أو 60 سم؟

لأ، مش على منشار المتر. دول للمناشير الأصغر. على منشار المتر ينفع ديسك 1 متر أو 80 سم.

الديسك بيعيش قد إيه؟

على حسب سمك الخرسانة وكثافة الحديد والمية وسرعة الجر. مية مستمرة وتغذية بطيئة يعني متر أكتر من كل ديسك.

المنشار بيشتغل على كهرباء إيه؟

220 فولت. ولو الموقع على مولد، لازم يكون مناسب للمنشار ومنتظم، ومفيش عليه ماكينة لحام في نفس الوقت.

بتقصوا عند العميل؟

لأ. احنا متخصصين في بيع وصيانة معدات القص والتخريم بس. الصفحة دي عشان تختار المعدة الصح وتعملها بنفسك أو بفريقك.