قص فتحة أسانسير أو سلم في السقف الخرساني بالمنشار: منشار المتر وعمق 41 سم
فتحة أسانسير في عمارة قائمة، أو سلم داخلي بيربط دورين (دوبلكس)، معناها قص جزء من سقف خرساني مسلح بخط مستقيم ونضيف، من غير ما تهز المبنى ولا تشقق اللي حوالين الفتحة. الشغلانة دي بتتعمل بمنشار قص الخرسانة بديسك 1 متر، اللي بيقطع الخرسانة بحديدها لعمق 41 سم.
قبل ما تقص: المهندس الإنشائي الأول
فتحة في سقف قائم بتشيل جزء من البلاطة، وساعات بتقطع كمرة. مكان الفتحة وأبعادها وطريقة التدعيم حواليها قرار مهندس إنشائي، مش قرار الفني ولا صاحب العقار. اقص بعد الرسم والموافقة.
المنشار المناسب: منشار المتر
99% من الفنيين اللي بيشتغلوا في القص بيشتروا منشار قص الخرسانة بديسك 1 متر، لأنه بيغطي أغلب الشغل: أغلب الأسقف والحوائط اللي بتتقص سمكها مش بيعدّي 40 سم. والمنشار مش زي الكور: مفيش ديسك لكل سمك. ديسك المتر الواحد هو اللي بيقطع بيه كل الشغل، سواء السمك 10 سم أو 41 سم.
معلومة محدش بيقولها، ولا حتى مصنع المنشار: ديسك المتر بيقدر ينزل لعمق 42 سم، لكن ده وهو جديد والفص لسه بكامل ارتفاعه. أول ما الفص يبدأ يتآكل العمق بيقل. علشان كده احنا بنقول 41 سم، عشان تحسب على الرقم اللي هتلاقيه فعلًا طول عمر الديسك، مش على رقم الكتالوج.
المنشار بيتركب على سكة بتتثبت على السقف، وموجود بقدرتين وتلات أنظمة تحكم: يدوي، ونص أوتوماتيك، وأوتوماتيك بالكامل. الفرق بينهم في المجهود والإنتاجية، مش في عمق القص. اقرأ الدليل الكامل لقص الخرسانة لو عايز تفهم الفرق بين الموديلات.
ديسكات 40 و60 سم مش بتتركب على منشار المتر: بتتعوج تحت ضغطه. الديسك الأصغر اللي ينفع عليه هو 80 سم، وبيقطع لعمق 31 سم.
خطوات قص فتحة في السقف
- علّم الفتحة على السقف حسب رسم المهندس، وراجع الدور اللي تحت: مفيش مواسير ولا كابلات في خط القص، ومفيش حد شغال تحت الفتحة.
- أمّن الجزء اللي هيتقص قبل آخر قصة. الجزء ده هيبقى كتلة خرسانة تقيلة، ولازم يكون مدعّم أو معلّق قبل ما ينفصل عشان ما يقعش فجأة. ولو الفتحة كبيرة، قسّمها لقطع تقدر تنزّلها وتشيلها.
- ثبّت السكة على خط القص تثبيت كامل. أي حركة في السكة بتعوّج الديسك.
- وصّل المية وخليها مستمرة طول القص. المية بتبرّد الديسك وبتمنع التراب.
- اقص على مرحلتين، مش مرة واحدة. لو السقف 40 سم، متنزلش الـ 40 سم كلها في قصة واحدة. انزل 20 سم الأول واقطع لحد آخر السكة، وبعدين ارجع من الأول وكمّل الـ 20 سم الباقيين من غير ما تنقل السكة، عشان الديسك يمشي في نفس خط السير من غير أي ميلان.
- التغذية بطيئة. سواء المنشار يدوي أو نص أوتوماتيك أو أوتوماتيك بالكامل، سرعة الجر لازم تكون بطيئة، ولو هتزوّدها زوّدها بالتدريج البطيء جدًا حسب استجابة المنشار ونوع الخرسانة وعمقها.
- كرّر على باقي الأضلاع، ونزّل القطعة بالطريقة اللي اتفقت عليها مع المهندس، وبعدين نفّذ التدعيم حوالين الفتحة زي ما الرسم بيقول.
أشهر غلطات القص بالمنشار
- سرعة الجر أعلى من اللازم. أكتر غلطة في القص على الإطلاق. بتحرق الفصوص، وبتجهد الموتور، وممكن تعوّج الديسك.
- النزول بالعمق كله مرة واحدة. الصح مرحلتين في نفس السكة زي ما شرحنا فوق.
- نقل السكة بين المرحلتين. القصة التانية ما بتجيش على خط الأولى، والديسك بيتحشر أو يميل.
- تركيب ديسك 40 أو 60 سم على منشار المتر. الديسك بيتعوج.
- مولد كهربا غير مناسب. مولد ضعيف أو غير منتظم، أو مولد قوي بس شغال عليه في نفس الوقت جهاز قوي تاني زي ماكينة لحام. ده بيحرق الموتور.
- قص من غير مية كفاية. الفصوص بتتحرق والديسك بيسخن.
- القص قبل تأمين القطعة اللي هتقع.
سعر المتر والديسك بيعيش قد إيه؟
مفيش سعر ثابت لمتر القص، لأنه بيتحدد بسمك الخرسانة وتسليحها وطول القص ومكان الشغل واستهلاك الديسك. والديسك بيعيش على حسب سمك الخرسانة وكثافة الحديد والمية وسرعة الجر، ولما فصوصه تخلص بيتجدد بفصوص جديدة ومش بيترمي. التفاصيل كلها في دليل قص الخرسانة.
أسئلة بتتكرر
السقف أو الكمرة أسمك من 41 سم؟
منشار المتر بيقطع 41 سم من ناحية واحدة. الأجزاء الأسمك من كده بتتعامل حسب الحالة، ومنها واير قص الخرسانة للكتل السميكة جدًا. كلّمنا واشرح الشغل.
القص بيعمل اهتزاز يأثر على المبنى؟
لأ. المنشار بيقطع بالدوران مش بالطرق، فمفيش اهتزاز ولا تشققات زي التكسير. بس الفتحة نفسها لازم تكون بموافقة مهندس إنشائي.
أقدر أعمل فتحة الأسانسير بالكور بدل المنشار؟
الكور بيعمل فتحات دايرية متجاورة، وحوافها بتطلع مسننة، ومش عملي للفتحات الكبيرة. فتحة الأسانسير والسلم شغل المنشار.
قص المتر بياخد وقت قد إيه؟
مفيش رقم ثابت، لأن سرعة القطع بتتأثر بخبرة الفني، وعمق الخرسانة ونوعها وتسليحها، والتبريد بالمية، ونوع المنشار، ونوع الفص، ووضع القطع أفقي ولا رأسي.
المنشار بيشتغل على كهرباء إيه؟
220 فولت. ولو الموقع على مولد، لازم يكون مناسب للمنشار ومنتظم، ومفيش عليه ماكينة لحام في نفس الوقت.
بتقصوا عند العميل؟
لأ. احنا متخصصين في بيع وصيانة معدات القص والتخريم بس. الصفحة دي عشان تختار المعدة الصح وتعملها بنفسك أو بفريقك.
Concrete cutting saw prices
Concrete cutting saws start from 84,690 EGP depending on power and control type.
| Product | Price |
|---|---|
| Reinforced Concrete Cutting Saw with 1 m Blade – Original Oubao6880 W – Semi-automatic | 84,690 EGP |
| Reinforced Concrete Cutting Saw with 1 m Blade – Original Oubao10800 W – Manual | 89,600 EGP |
| Reinforced Concrete Cutting Saw with 1 m Blade – Original Oubao10800 W – Semi-automatic | 94,865 EGP |
| Reinforced Concrete Cutting Saw with 1 m Blade – Original Oubao10800 W – Fully automatic | 109,340 EGP |
| Reinforced Concrete Saw Blades16 inch (40 cm) | 3,710 EGP |
| Reinforced Concrete Saw Blades24 inch (60 cm) | 4,730 EGP |
| Reinforced Concrete Saw Blades80 cm – Premium grade | 9,800 EGP |
| Reinforced Concrete Saw Blades1 m – Premium grade | 13,475 EGP |
| Original Diamond Wire Saw for Reinforced Concrete – 50 m Box + 100 Sleeves | 73,250 EGP |
The price you see is the price you pay. No teaser price that changes when you contact us. Fast shipping inside and outside Egypt; the cost depends on your location and the order weight.