الكور تست: أخذ عينات الخرسانة ببنطة 4 و6 بوصة وماكينة ستاند
الكور تست هو إنك تاخد عينة أسطوانية من خرسانة قائمة (عمود، كمرة، سقف، أرضية) عشان تتكسر في المعمل وتعرف إجهادها الحقيقي. بيطلبه الاستشاري لما في شك في الخرسانة، وفي استلام المباني، وفي الترميم والتدعيم، وفي فحص المباني القديمة قبل التعلية. العينة لازم تطلع سليمة ومستقيمة ومن غير شروخ، وإلا النتيجة بتطلع غلط والعينة بتتعاد.
مقاس عينة الكور تست
الكور تست بيتعمل بمقاسين بس: بنطة 4 بوصة (102 ملي) أو بنطة 6 بوصة (152 ملي). المقاس المطلوب، وطول العينة، وعددها، ومكانها، كل ده بيحدده المعمل أو الاستشاري حسب المواصفة اللي بيشتغل بيها. انت كفني التزم باللي في الطلب.
طول البنطة القياسي 40 سم، وده كفاية لأغلب العينات. ولو مطلوب أعمق، في وصلات تطويل.
الماكينة المناسبة للكور تست
الأنسب للكور تست ماكينة ستاند: العينة لازم تطلع عمودية ومستقيمة ومن غير اهتزاز، والستاند متثبت فبيطلّعها أظبط. عينة 6 بوصة أكبر من حدود الماكينة اليدوي، أما عينة 4 بوصة فاليدوي تقدر تخرّمها لو العمق لحد 20 سم، وللأمانة Oubao 160 قوية وعنيفة ومحتاجة فني متدرب.
قاعدة المقاس: الماكينة أكبر من البنطة ببوصتين. لبنطة 4 بوصة الماكينة المناسبة 6 بوصة، وأقرب مقاس متوفر هو 8 بوصة. ولبنطة 6 بوصة الماكينة المناسبة 8 بوصة. يعني ماكينة كور 8 بوصة ستاند بتغطي الكور تست كله بالمقاسين.
لو شغلك يومي وكثيف (معمل أو شركة فحص بتاخد عينات كل يوم) Cayken الأصلية خاماتها أعلى. ولو الشغل متوسط، Oubao الأصلية أفضل قيمة مقابل السعر. الماكينة بتيجي لوحدها من غير بنط.
إزاي تطلّع عينة كور تست سليمة
- حدد مكان العينة مع الاستشاري، بعيد عن حديد التسليح قدر الإمكان، ومن غير ما تضعف العنصر الإنشائي. الكور تست في عمود أو كمرة قرار المهندس الإنشائي، مش قرار الفني.
- ثبّت الماكينة تثبيت كامل: أكمن في الخرسانة، وبعدها ظبّط مسامير الاتزان اللي تحت القاعدة لحد ما الماكينة ما تتحركش. أي اهتزاز بيطلع في العينة شروخ.
- اتأكد إن عمود الماكينة عمودي على السطح، عشان العينة تطلع مستقيمة مش مايلة.
- مية مستمرة من قبل ما البنطة تلمس الخرسانة لحد ما تخلص.
- تغذية خفيفة وثابتة. في الكور تست بالذات الاستعجال بيكسّر العينة. سيب البنطة تاخد وقتها.
- طلّع العينة بالراحة من غير ما تخبط عليها، وعلّم عليها مكانها وتاريخها، ولفها زي ما المعمل طالب.
- املا الفتحة بعد كده زي ما الاستشاري طالب.
ليه العينة بتطلع مكسورة؟ الغلطات اللي بتبوظ الكور تست
- تثبيت ناقص. أكمن من غير ضبط مسامير الاتزان، أو الفني واقف على القاعدة برجله بدل التثبيت. الماكينة بتهتز والعينة بتتشقق، وغير كده ده خطر على الفني.
- ضغط زيادة على دراع التغذية. أكتر سبب لكسر العينة وحشر البنطة.
- مية مش كفاية. الفص بيتحرق، والعينة بتسخن.
- سرعة دوران أعلى من اللازم لقطر البنطة. خطر، وبيبوظ الفص.
- ريجلاج عربية الماكينة سايب. العربية هي الجزء اللي الموتور مربوط فيه وبيتحرك على العمود المربع. لو ريجلاجها مش مظبوط الماكينة بتهتز وهي بتخرّم، والعينة بتطلع بشروخ. راجعه بشكل دوري.
- عينة أكبر من حدود الماكينة. عينة 6 بوصة مثلًا أكبر من حدود الماكينة اليدوي، فلازم ستاند.
- الأكمن في الطوب. لو العينة من عنصر جنبه طوب، متدقش الأكمن في الطوب؛ الأكمن للخرسانة بس، وممكن يطلع والماكينة شغالة. في الطوب ثبّت الستاند بخرم نافذ وتيش 12 ملي (جويد أو مسمار من غير راس) من الناحيتين، أو بمسمار تثبيت الحوائط المخصوص لو مش هتوصل لورا الحيطة.
- الماكينة على مولد غير مناسب. مولد ضعيف أو غير منتظم، أو عليه ماكينة لحام في نفس الوقت، ممكن يحرق الموتور.
البنطة بتعيش قد إيه؟
بيعتمد على كثافة الحديد والمية وضغط التغذية. ولما الفصوص تخلص، بنركّب فصوص جديدة على نفس البنطة وترجع تشتغل، والتركيب شامل 3 اختبارات للبنطة (السماكة والرفة والبيضاوي) وقصها عشان نتأكد إنها سليمة وتنفع تشتغل تاني.
شغلك مش كور تست؟ شوف مقاس البنطة والماكينة لكل شغلانة كور.
أسئلة بتتكرر
الكور تست بيضعف المبنى؟
فتحة 4 أو 6 بوصة في مكان محدده الاستشاري مش بتأثر، وبتتملى بعد كده. اللي بيضعف المبنى إن الفني يختار المكان لوحده أو ياخد عينات كتير من عنصر واحد.
أقدر أعمل كور تست بماكينة يدوي؟
عينة 6 بوصة لأ، لأنها أكبر من حدود الماكينة اليدوي. عينة 4 بوصة اليدوي تقدر تخرّمها لو العمق لحد 20 سم، بس الستاند أثبت والعينة بتطلع أظبط. ولو المعمل أو الاستشاري ليه شرط في طريقة أخذ العينة، التزم بيه.
العينة طلعت مكسورة، السبب إيه؟
في الغالب واحد من تلاتة: تثبيت ناقص، أو ضغط زيادة، أو مية مش كفاية. راجع التلاتة قبل العينة اللي بعدها.
الماكينة بتشتغل على كهرباء إيه؟
220 فولت.
بتاخدوا عينات عند العميل؟
لأ. احنا متخصصين في بيع وصيانة ماكينات الكور والبنط بس. الصفحة دي عشان المعمل أو شركة الفحص تختار المعدة الصح وتشتغل بيها بنفسها.
Prices for concrete core test sampling
An 8 inch stand core drill and a 4 inch bit come to 15,170 EGP in total; the 6 inch bit is 1,425 EGP.
| Machine or bit | Price |
|---|---|
| Original Oubao 8 Inch Core Drilling Machine OB-205 | 14,160 EGP |
| Original Cayken 8 Inch Core Drilling Machine SCY-2050 | 22,940 EGP |
| Diamond Core Drill Bit 4 inch (102 mm) | 1,010 EGP |
| Diamond Core Drill Bit 6 inch (152 mm) | 1,425 EGP |
| 12 mm Core Drill Anchor – Heavy-Duty | 275 EGP |
| CNC Core Bit Extension Rods | 710 EGP |
The price you see is the price you pay. No teaser price that changes when you contact us. Fast shipping inside and outside Egypt; the cost depends on your location and the order weight.